ព្រឹកថ្ងៃទី១៥ ខែកក្កដា ឆ្នាំ២០២៤ មន្រ្ដី អ.ក.ជ.ប.អ. បានរៀបចំបទបង្ហាញចែករំលែកចំណេះដឹង ស្តីពី គោលនយោបាយពាក់ព័ន្ធនឹងប្រាក់ឈ្នួលអប្បបរមា ដែលបង្ហាញដោយ លោក និន វុទ្ធី នៅអគារទីស្ដីការក្រសួងការងារ ដែលមានសមាសភាពចូលរួមពីមន្រ្ដីផ្នែកផែនការ និងសហប្រតិបត្តិការ និងមន្រ្ដីស្ម័គ្រចិត្តចំនួន ១៦រូប។
បទបង្ហាញបានចែករំលែកអំពី គោលនយោបាយ ក្របខណ្ឌគោលនយោបាយ និងផែនការយុទ្ធសាស្ត្រ ដែលពាក់ព័ន្ធរួមមាន៖
ការកំណត់ប្រាក់ឈ្នួលអប្បបរមា, ការលើកកម្ពស់លក្ខខណ្ឌការងារសមរម្យសម្រាប់កម្មករនិយោជិត, ការពង្រីកអភិបាលកិច្ចការងារ, ភាពប្រកួតប្រជែង និងការរក្សាបាននូវសុខដុមនីយកម្មក្នុងទំនាក់ទំនងវិជ្ជាជីវៈ។
ជាលទ្ធផលគោលនយោបាយពាក់ព័ន្ធនឹងប្រាក់ឈ្នួលអប្បបរមា គឺចង់បង្ហាញអំពីទិសដៅ និងវិសាលភាព នៃការអនុវត្ត, ក្រុមគោលដៅ ដែលទទួលផលប្រយោជន៍ និងលទ្ធផលសម្រេចបានតាមរយៈរបាយការណ៍, ក្របខណ្ឌតាមដាន ត្រួតពិនិត្យ និងវាយតម្លៃ នៃសូចនាករនីមួយៗ និងការបង្ហាញនូវវីដេអូកិច្ចសម្ភាសន៍ អំពីសមិទ្ធផលការងារ របស់ក្រសួងការងារ និងបណ្តុះបណ្តាលវិជ្ជាជីវៈ នៅក្នុងឆមាសទី១ ឆ្នាំ២០២៤ ជូនមន្ត្រីស្ម័គ្រចិត្តផងដែរ។
